08 太湖海鮮城
Fusion 始祖。宵夜至尊 太湖海鮮城 何竟成 「酒樓佬」典範。以舖為家 我成日講,「酒樓佬」有樣睇,而我老友太湖海鮮城董事總經理何竟成(下稱成哥),就是最佳人版。話說有次他同老婆遊完埠,晚上返香港落機。老婆問:「係咪返屋企?」何生答:「係。」上了的士,何生卻隨口對司機說:「太湖。」老婆問:「又話返屋企?!」何生理直氣壯說:「太湖咪屋企囉!」 同屬酒樓佬的我,聽罷,完全明白。特別是六、七十年代入行的一輩,一般都係日做十幾個鐘,董生(董建華)話佢朝7晚11,其實有甚麼出奇。 訪問當天,成哥一身藍西裝、白恤衫,典型「酒樓佬」裝扮,都已經透露了他的職業。飲食業就好似個大舞台,永遠是人哋放假、我哋返工,除了瞓覺之外,一起身便是著住套西裝,所以我幾十年的酒樓歲月裡,都無一套休閒服,更莫論休閒!即使去到外邊酒樓,一身藍西裝、白恤衫,都無侍應斟茶給你,只有返到自己舖頭,夥計認得我,才一個個搶住埋來斟茶。 海洋皇宮夜總會是我老子所打落的江山,而成哥早在十幾歲,便已經跟他老子入行,由最初在油雞檔做起,然後轉做廳面。成哥說:「我其實也曾經轉行,不過最後都吃回頭草,79年我在雅苑酒家任職,後來得到香滿樓老闆黃太賞識,邀請我過檔。」雅苑雖然憑野味打響名堂,但相比專做闊佬客的香滿樓,成哥此著可說是「升呢」! 八十年代,香滿樓可謂相當有名,老闆黃太本業並非從事飲食,勝在大把物業在手,最初在灣仔駱克道自置物業開第一間香滿樓;之後在太平道再開,見成哥做得有聲有色,索性購入所租用舖位;後來新鴻基郭得勝先生游說黃太在帝苑酒店開分店;全盛時期,香滿樓在香港共有6間、美國三藩市一間,近年開始回巢幫成哥手的細仔Keven便是在三藩市出世。 屢創先河。Fusion 鼻祖 成哥說:「八十年代,香滿樓和東海鍾錦都算是比較新派,好像我哋帶頭在酒樓內擺設陳列吧檯,一次過推出好多款小食,來到吸引人客;而且我哋好肯試新嘢,見到有甚麼特別食材,便叫一批回來試,好像用大大隻八爪魚切片蘸wasabi,同用蟹柳、多春魚同八爪魚來到出冷盤,此外,首創金菇牛肉卷仲用埋隻日本魚生豉油來做芡汁,用蟹柳來做鴨腳紮等等,不斷推陳出新。」 說起來,成哥可說是大亞日本食品許威望的伯樂,是很早期已經向他取金菇、大八爪魚、蟹柳和多春魚等日本食材的老主顧之一,更難得是成哥任職的是中菜酒樓!當年甚至未流行fusion一詞,廣東佬